Soomaaliya oo uga digtay beeralayda fatahaado halis gelin kara dalagyada

Muqdisho (Dawan) – Dowladda Federaalka Soomaaliya ayaa digniin u dirtay beeralayda dalka, iyadoo ugu baaqday inay u diyaar garoobaan fatahaado suurtagal ah, gaar ahaan deegaannada ku teedsan webiyada waaweyn. Wasiirka Beeraha iyo Waraabka, Maxamed Cabdi Xayir (Maareeye), ayaa fariintan ku gudbiyay muuqaal uu duubay maalinnimadii Talaadada.

Digniintan ayaa timid xilli saadaasha hawadu muujinayso roobab mahiigaan ah oo la filayo, kuwaas oo sare u qaadaya walaaca laga qabo fatahaadaha webiyada Shabeelle iyo Jubba, oo laf-dhabar u ah wax-soo-saarka beeraha ee dalka.

“Ilaahay ayaan uga mahadcelinaynaa roobabka, balse saadaashu waxay tilmaamaysaa fatahaado suurtagal ah, gaar ahaan agagaarka Webiga Shabeelle iyo marin-biyoodyada kale ee waaweyn,” ayuu yiri Wasiir Maareeye. Waxa uu raaciyay hadalkiisa “Beeralayda ku dhow aagaggaas waa inay qaadaan tallaabooyin taxaddar leh, maadaama fatahaaduhu ay dhici karaan waqti dhow.”

Webiyada Shabeelle iyo Jubba, oo door muhiim ah ku leh waraabka, ayaa durba muujiyay calaamado muujinaya kororka heerka biyaha. Sida ay muujinayaan xogaha ugu dambeeyay, roobab culus oo ka da’ay gobollada Hiiraan, Shabeellaha Hoose, iyo qaybo ka mid ah Jubbooyinka ayaa sababay daadad iyo barakaca kumannaan qof.

Wasiir Maareeye ayaa sidoo kale ugu baaqay wasaaradaha beeraha ee heer dowlad-goboleed iyo maamullada deegaanka inay u diyaar garoobaan saameynta ka dhalan karta fatahaadaha. Wuxuu shacabka u xaqiijiyay in Dowladda Federaalka ay garab istaagi doonto bulshooyinka ay saameyntu gaarto inta ay suuragal tahay.

Digniintan ayaa muujinaysa nuglaanta qaybta beeraha ee Soomaaliya, taas oo si weyn ugu tiirsan biyaha webiyada ee waraabka. Wasiirku wuxuu ku nuux-nuuxsaday muhiimadda qaadashada tallaabooyin ka hortag ah si loo yareeyo khasaaraha suurtagalka ah, iyadoo la xusuusto in fatahaadihii hore ay sababeen khasaare ballaaran, oo ay saameeyeen in ka badan 300,000 oo qof sannadkii 2022 oo keliya.