Nairobi (Dawan)- Soomaaliya ayaa Hay’adda Qaramada Midoobay u qaabilsan Deegaanka ee UNEP iyo bahwadaagta caalamiga ah ka dalbatay maalgelin joogto ah oo lagu xoojiyo u-adkeysiga isbeddelka cimilada, sida ay sheegtay Safaaradda Soomaaliya ee Kenya Jimcihii.
Codsiga ayaa Soomaaliya ka jeedisay shirkii 175-aad ee Guddiga Wakiillada Joogtada ah ee UNEP oo ka dhacay Nairobi, kaas oo looga hadlay ilaalinta deegaanka, dhibaatooyinka cimilada iyo iskaashiga caalamiga ah.
Danjiraha Soomaaliya ee Kenya, ahna wakiilka joogtada ah ee dalka u fadhiya UNEP, Jabriil Ibraahim Cabdulle, ayaa shirka ku soo bandhigay mudnaanta Soomaaliya ee maaraynta waarta ee biyaha, horumarinta xogta deegaanka iyo hirgelinta xalal lagu yareynayo saameynta isbeddelka cimilada.
Safaaradda ayaa sheegtay in Soomaaliya ay ku baaqday maalgelin joogto ah oo la saadaalin karo, si ballanqaadyada la xiriira deegaanka loogu beddelo tallaabooyin wax ku ool ah oo ka jawaabaya baahiyaha bulshada.
