Soomaaliya (Dawan) – Dowladda Federaalka Soomaaliya ayaa wadda qorshe lagu hirgelinayo xarun qaran oo kaydinta iyo maareynta xogta (National Data Center) ah, taas oo qayb ka noqonaysa dadaallada lagu horumarinayo kaabeyaasha teknoolojiyadda iyo adeegyada dijitaalka ah ee dalka.
Wasiiru Dowlaha Wasaaradda Isgaarsiinta iyo Teknolojiyadda Soomaaliya, Axmed Cusmaan Diiriye, ayaa sheegay in dowladda ay xoogga saarayso dhismaha kaabeyaasha muhiimka u ah horumarinta teknoolojiyadda, isagoo tilmaamay in xarunta Data Center-ka ay wax weyn ka tari doonto baahida dalka ee dhinacyada kaydinta iyo maareynta xogta.
Wasiiru Dowlaha ayaa hadalkan ka sheegay munaasabad lagu soo bandhigay Garad.ai, oo ay samaysay Arkaan AI Center, halkaas oo uu ku sheegay in Dowladda Soomaaliya ay dhiirrigelinayso hal-abuurka iyo adeegsiga teknoolojiyadda casriga ah, gaar ahaan mashaariicda ay hormuudka ka yihiin dhalinyarada Soomaaliyeed.
Axmed Cusmaan Diiriye ayaa xusay in Soomaaliya ay horumar ka samaynayso dhinaca teknoolojiyadda, balse ay weli jirto baahi loo qabo xoojinta kaabeyaasha dijitaalka ah ee dalka, si loo helo adeegyo casri ah oo ammaan iyo kalsooni leh.
