Muqdisho (Dawan) – Soomaaliya ayaa gashay xilli-roobaadka Gu’ga oo soconaya bilaha April ilaa June, iyadoo roobabkii ugu horreeyay ee ka da’ay koonfurta iyo bartamaha dalka ay sababeen daadad iyo fatahaado meelo kooban ah, gaar ahaan gobollada Shabeellaha Dhexe, Gedo, Galgaduud iyo Togdheer.
Gobolka Shabeellaha Dhexe, webiga Shabeelle ayaa fatahay, waxaana biyuhu galeen tuulada Shinile. Magaalada Jowhar, fatahaadaha iyo daadadka ka dhashay roobabka ayaa barakiciyay ku dhowaad 400 oo qoys, sida lagu sheegay warbixinnada hordhaca ah ee la xiriira xaaladda roobabka.
Gobolka Togdheer, daadad ka dhacay degmada Buuhoodle ayaa barakiciyay in ka badan 250 qoys, waxaana ku dhaawacmay 25 qof, halka laba qof ay ku dhinteen.
