Muqdisho (Dawan) – Maxkamadda Ciidamada Qalabka Sida ee Soomaaliya ayaa laba eedeysane oo lagu helay inay ka tirsan yihiin Al-Shabaab ku xukuntay xabsi daa’in, kadib markii afar nin lagu soo oogay dambiyo la xiriira qaraxyo, dilal qorsheysan iyo howlaha saadka ee kooxda.
Sida ay sheegtay Maxkamadda Ciidamada Qalabka Sida, afarta eedeysane ayaa lagu soo oogay dacwado la xiriira sameynta walxaha qarxa, fulinta dilal qorsheysan, basaasnimo, tashkiilin iyo kala gudbinta xubno ka tirsan kooxda.
Xeer ilaalinta ayaa sheegtay in saddex kamid ah eedeysanayaasha lagu qabtay walxaha qarxa oo lagu qariyay qalabka guriga sida kululeeyaha raashinka iyo gasacyada rinjiga, iyo agab kale oo loo adeegsan jiray sameynta qaraxyada.
Maxkamaddu waxay sidoo kale sheegtay in mid kamid ah eedeysanayaasha, Aweys Cabdalla Cali Kaamiri oo loo yaqaanay “Shubka Saciid”, uu door muhiim ah ku lahaa qorsheynta weerarrada iyo isku dubbaridka howlaha qaraxyada ee magaalada Muqdisho.
Baaritaannada ayaa muujiyay in shabakaddan lala xiriiriyay weerarro lagu beegsaday goobo ganacsi, guryo, ciidamada ammaanka iyo dad rayid ah, kuwaas oo sababay khasaare naf iyo maalba leh.
