Soomaaliya oo xaqiijisay dilka hoggaamiye sare oo ka tirsan Al-Shabaab

Soomaaliya, 9 Febraayo 2026 (Dawan) — Dowladda Federaalka Soomaaliya ayaa maanta oo Talaadado ah xaqiijisay in ciidamada ammaanka qaranka, oo kaashanaya saaxiibada caalamiga ah, ay dileen hoggaamiye sare oo ka tirsanaa Al-Shabaab, kaddib hawlgal si gaar ah loo qorsheeyay oo ka dhacay koonfurta dalka.

Hay’adda Sirdoonka iyo Nabadsugidda Qaranka (NISA) ayaa sheegtay in hoggaamiyaha la dilay lagu magacaabi jiray Maxamed Sahal Iidle, oo sidoo kale loo yaqaannay Abuu Usaama, kaas oo lagu bartilmaameedsaday 8-dii bishaan Febraayo agagaarka degmada Saakow ee gobolka Jubbada Dhexe.

NISA waxay sheegtay in Abuu Usaama uu ahaa saaxiib dhow oo xiriir la lahaa hoggaamiyaha Al-Shabaab Axmed Diiriye, isla markaana loo diyaarinayay inuu qabto xil sare oo la xiriira hoggaanka maaliyadda kooxda.

Sidoo kale, hay’addu waxay tilmaantay in Abuu Usaama uu door muhiim ah ka ciyaaray nidaamka canshuuraha Al-Shabaab ka qaado shacabka, isagoo horey uga soo shaqeeyay xilal kala duwan oo muhiim ah, oo ay ka mid yihiin guddoomiyaha gobolka Shabeellaha Hoose iyo mas’uul ka tirsanaa maamulka kooxda ee Kismaayo xilligii ay gacanta ku hayeen magaalada.

Dowladda Federaalka Soomaaliya ayaa sheegtay in hawlgalkan uu qayb ka yahay ololaha ciidan iyo sirdoon ee sii socda, kaas oo ay taageerayaan ciidamada Midowga Afrika iyo saaxiibada caalamiga ah, si loo wiiqo hoggaanka Al-Shabaab, ilaha dhaqaale ee ay ku shaqeeyaan, iyo awoodda ay u leeyihiin fulinta hawlgallada