Arusha (Dawan) – Soomaaliya ayaa doonaysa inay xoojiso xiriirka baarlamaannada dalalka Carabta, iyadoo Guddoomiyaha Golaha Shacabka ee Baarlamaanka Federaalka Soomaaliya , Cabduqaadir Maxamed Nuur uu Axaddii magaalada Arusha kula kulmay Madaxweynaha Baarlamaanka Carabta, Maxamed Axmed Al-Yamahi, sida lagu sheegay bayaan ka soo baxay Baarlamaanka Soomaaliya.
Labada dhinac ayaa ka wada hadlay xoojinta iskaashiga u dhexeeya Baarlamaanka Soomaaliya iyo baarlamaannada dalalka Carabta, joogteynta wadatashiyada, isku-duwidda mowqifyada ku aaddan arrimaha ay dan wadaagga ka leeyihiin iyo kordhinta doorka Soomaaliya ee iskaashiga baarlamaannada Carabta, sida lagu sheegay bayaanka.
Waxay sidoo kale carrabka ku adkeeyeen xiriirka soo jireenka ah ee ka dhexeeya Soomaaliya, dalalka Carabta iyo shucuubta Carabta, kaas oo ku saleysan is-ixtiraam, dano wadaag iyo iskaashi.
