Soomaaliya oo yeelatay qeybtii ugu horreysay ee lagu daweeyo haweenka qaba xanuunnada dhimirka

“Maanta furitaanka qaybta haweenka ma aha oo keliya arrin caafimaad; waxay ka hadlaysaa caddaalad iyo dowladnimo, si ragga iyo dumarkuba ay u helaan adeegyo siman. Xanuunnada dhimirka ragga ku dhaca dumarkana way ku dhacaan, balse mararka qaar haweenku way ka xishood badan yihiin ama way ka adkaysi badan yihiin inay raadsadaan gargaar,” ayuu yiri.

Wuxuu intaas ku daray in dowladda iyo bulshada Soomaaliyeed ay si wadajir ah uga shaqeyn doonaan sidii caafimaadka dhimirka looga dhigi lahaa arrin mudnaan qaran leh, isla markaana loo yareyn lahaa takoorka iyo ceebeynta la xiriirta cudurrada dhimirka.

Agaasimaha Guud ee Isbitaalka Laansaleeti, Maxamed Jacfar Cali ayaa sheegay in isbitaalku hore u lahaa qaybta caafimaadka dhimirka ee ragga, balse hadda haweenkuna ay heli doonaan adeegyo u dhigma kuwaas, oo ay ku jiraan daaweyn iyo la-talin.

Mas’uuliyiinta ayaa xusay in tallaabadan ay sare u qaadi doonto wacyiga bulshada ee ku aaddan xanuunnada dhimirka, isla markaana ay fududeyn doonto helitaanka adeegyada caafimaadka maskaxda ee haweenka Soomaaliyeed.