Muqdisho (Dawan)— Soomaaliya ayaa dib ugu soo celisay dalka 154 muwaadin oo muddo qaxooti ahaan ugu noolaa Yemen, kuwaas oo Arbacadii ka soo duulay garoonka diyaaradaha caalamiga ah ee Cadan, iyagoo ka faa’iideysanaya barnaamijka Assisted Spontaneous Return (ASR) ee ay taageerto Hay’adda Qaxootiga Qaramada Midoobay (UNHCR).
Hay’adda Qaxootiga iyo Barakacayaasha Qaranka (NCRI) ayaa sheegtay in dadka soo laabtay ay si iskood ah oo ammaan ah ugu soo laabteen Soomaaliya, ayna soo gaareen magaalada Muqdisho.
Barnaamijka ASR oo ay fududeyso UNHCR ayaa taageera qaxootiga Soomaaliyeed ee doorta inay si iskood ah ugu laabtaan dalkooda.
Ururka Nahda Makers, oo ah hay’ad bani’aadantinimo oo ka howlgasha Yemen, ayaa taageeray howlgalkii ugu dambeeyay, isagoo ka qeyb qaatay diiwaangelinta, xaqiijinta dukumentiyada, wacyigelinta ka hor safarka iyo gaadiidka dadka soo laabanaya iyo alaabtooda loo geeyay garoonka diyaaradaha, sida uu ururku sheegay.
Hay’adda Human Access Organization ayaa dadka soo laabanayay ka qaaday baaritaanno caafimaad ka hor intii aysan ka dhoofin Yemen, halka UNHCR ay taageertay howlaha soo laabashada, sida ay sheegtay Nahda Makers.
NCRI ayaa sheegtay inay ka shaqeyn doonto sidii dadka soo laabtay ay u heli lahaayeen adeegyada aasaasiga ah iyo taageerada lagama maarmaanka u ah dib-u-dhexgalkooda iyo noloshooda maalinlaha ah.
