Soomaaliya u riyaaqday go’aanka Maxkamadda Racfaanka Bariga Afrika

Soomaaliya, 20 Janaayo 2026 (Dawan)– Wasaaradda Arrimaha Dibadda ee Soomaaliya ayaa maanta oo Talaado ah soo dhowaysay go’aanka Maxkamadda Racfaanka ee Bariga Afrika, kaas oo meesha ka saaray go’aannadii hore ee lagu hakiyay dhaarinta wakiilladii Soomaaliya loogu doortay Golaha Sharci-dejinta ee Bariga Afrika (EALA).

Maxkamadda Racfaanka ayaa maalintii Isniinta laashay hakintaas, taas oo ka dhalatay dacwad ay gudbiyeen aqoonyahanno iyo siyaasiyiin Soomaaliyeed, kuwaas oo ku dooday in habraacii doorashada ee bishii Oktoobar 2025 ka dhacay Muqdisho uu ahaa mid eex siyaasadeed ku jirtay, isla markaana aan waafaqsanayn shuruucda Ururka Bariga Afrika (EAC).

Wasaaradda Arrimaha Dibadda ayaa hambalyo u dirtay sagaalkii xildhibaan ee Soomaaliya ee uu soo doortay Baarlamaanka Federaalka, iyadoo mar kale xaqiijisay sida ay Soomaaliya uga go’an tahay is-dhexgalka gobolka iyo iskaashiga ay la leedahay waddamada xubnaha ka ah EAC.

“Soomaaliya waxay sii wadaysaa hormarinta ka qaybgalkeeda Ururka Bariga Afrika. Wasaaradduna waxay weli u taagan tahay hubinta matalaad waxtar leh oo lagu dhex yeesho dhammaan xubnaha iyo hay’adaha EAC, si loo taageero danaha qaranka Soomaaliya iyo is-dhexgalka gobolka,” ayaa lagu yiri bayaan rasmi ah oo ka soo baxay Wasaaradda.

Soomaaliya ayaa si rasmi ah ugu biirtay EAC dhamaadkii sannadkii 2024, iyadoo raadinaysa in kor loo qaado dhaqaalaheeda iyo amniga gobolka ka dib tobanaan sano oo colaado ah. Si kastaba ha ahaatee, xubnihii ugu horreeyay ee Soomaaliya ku matali lahaa Baarlamaanka Gobolka ee fadhigiisu yahay Arusha ayaa horay looga hor istaagay inay guda galaan howlahooda bishii Noofambar 2025, ka dib markii dhaliilayaashu ku doodeen in doorashadu ay u xaglinaysay musharrixiin xiriir dhow la leh dowladda.

Golaha Sharci-dejinta ee Bariga Afrika (EALA) ayaa ah garabka sharci-dejinta ee Ururka Bariga Afrika, kaas oo oo ay ku mideysanyihiin wakiillo kasoo kala jeeda dalalka Burundi, Kenya, Rwanda, Koonfurta Suudaan, Tansaaniya, Uganda, iyo Soomaaliya, si loo xoojiyo iskaashiga iyo horumarinta gobolka.