Muqdisho (Dawan) — Hay’adda Qatar Charity iyo Isbitaalka Muqdisho Somali-Türkiye ayaa maanta magaalada Muqdisho ku kala saxiixday heshiis lagu fulinayo mashruuc caafimaad oo adeegyo kelyo-dhaqis oo bilaash ah loogu fidinayo 100 bukaan oo qaba xanuunnada kelyaha. Mashruuca ayaa socon doona muddo hal sano ah, waxaana maalgelintiisa iska kaashanaya Qatar Charity iyo Isbitaalka Muqdisho Somali-Türkiye.
Guddoomiyaha Xafiiska Qatar Charity ee Soomaaliya, Cabdifitaax Aadan, ayaa sheegay in ujeeddada heshiisku tahay in bukaannada kelyuhu fariisteen ay muddo sanad ah helaan adeegyo caafimaad oo dhammaystiran oo bilaash ah.
“Ujeeddada heshiisku waa in 100 bukaan oo kelyuhu fariisteen ay helaan adeegyo caafimaad oo bilaash ah,” ayuu yiri Cabdifitaax Aadan.
