Muqdisho (Dawan)- Dowladda Federaalka Soomaaliya ayaa bilowday barnaamij tababar ah oo loogu talagalay suxufiyiinta, kaas oo ujeedkiisu yahay xakameynta hadallada nacaybka iyo wararka been abuurka ah xilliyada doorashada, sida ay sheegtay Wasaaradda Warfaafinta, Dhaqanka iyo Dalxiiska Soomaaliya maanta oo Axad ah.
Aqoon-is-weydaarsigan, oo socon doona muddo laba maalmood ah kana dhacaya Muqdisho, waxaa ka faa'iideysanaya in ka badan 35 suxufi oo ka kala socda 21 xarumood oo warbaahineed, sida lagu sheegay bayaan ka soo baxay wasaaradda.
Wasiirka Warfaafinta, Daa’uud Aweys Jaamac, ayaa sheegay in warbaahintu ay door muhiim ah ka ciyaarto ilaalinta xasilloonida xilliga doorashada, iyadoo la hubinayo tabin sax ah oo mas’uuliyad ku dheehan tahay.
“Warbaahintu waxay door lama huraan ah ka ciyaartaa ilaalinta hufnaanta macluumaadka doorashada,” ayuu yiri wasiirku, isagoo ku boorriyay suxufiyiinta inay ilaaliyaan dheelitirka iyo heerarka xirfadeed si loo xoojiyo kalsoonida dadweynaha.