Talyaaniga (Dawan) — Toddobo ka mid ah tahriibayaal Soomaali ah oo la sheegay inay ku geeriyoodeen badda u dhaxaysa Liibiya iyo Talyaaniga ayaa lagu aasay magaalada Bari ee koonfurta dalka Talyaaniga.
Sida uu sheegay Telefishinka Dowladda Soomaaliya, dadka la aasay waxay ka mid ahaayeen 55 Soomaali ah oo geeriyooday kaddib markii ay qalibantay doontii ay saarnaayeen. Warbixinta ayaa lagu sheegay in shan ka mid ah dadka dhintay ay ahaayeen dumar.
Jaaliyadda Muslimiinta ee magaalada Bari ayaa ka qeyb qaadatay qabanqaabada aaska, iyadoo toddobada qof lagu aasay halkaasi. Sidoo kale, weli si rasmi ah looma shaacin goorta ay doontu qalibantay, iyadoo Telefishinka Qaranka Soomaaliya uusan sheegin taariikhda iyo waqtiga uu dhibaatadu dhacday.
