Taliyaha Ciidanka Dhulka Turkiga oo booqasho rasmi ah ku yimid Muqdisho

Muqdisho (Dawan) – Taliyaha Ciidanka Dhulka Dowladda Turkiga, Jeneraal Metin Tokel, ayaa maanta booqasho rasmi ah ku yimid magaalada Muqdisho, iyadoo booqashadiisu ku soo beegantay munaasabadda qalin-jabinta dufcadda 8-aad ee Leyli Saraakiisha Ciidanka Xoogga Dalka Soomaaliyeed oo lagu qabanayo Xerada Tababarka Ciidamada TURKSOM.

Jeneraal Metin Tokel ayaa garoonka diyaaradaha Aadan Cabdulle Cusmaan ku soo dhaweeyay Taliyaha Ciidanka Dhulka Xoogga Dalka Soomaaliyeed, Jeneraal Sahal Cabdullaahi Cumar, iyo saraakiil ka tirsan ciidamada Soomaaliya iyo Turkiga.

Booqashada Taliyaha Ciidanka Dhulka Turkiga ayaa qeyb ka ah dadaallada lagu xoojinayo iskaashiga difaaca ee labada dal, gaar ahaan dhinacyada tababarka ciidamada, horumarinta xirfadaha saraakiisha iyo sare u qaadidda awoodda Ciidanka Xoogga Dalka Soomaaliyeed.

Munaasabadda ka dhacaysa Xerada TURKSOM ayaa lagu maamuusayaa saraakiil ka tirsan Ciidanka Xoogga Dalka Soomaaliyeed oo soo dhammaystay tababarro la xiriira hoggaaminta ciidamada, qorsheynta howlgalada, maamulka cutubyada, anshaxa ciidanka iyo difaaca qaranka.

Booqashada Jeneraal Metin Tokel ayaa la filayaa inay sii xoojiso xiriirka milateri ee Soomaaliya iyo Turkiga, isla markaana ay ballaariso iskaashiga dhinacyada tababarka, qalabeynta, qorsheynta howlgalada iyo is-dhaafsiga khibradaha ciidamada.

Turkiga ayaa ka mid ah dalalka sida weyn u taageera dib-u-dhiska Ciidanka Xoogga Dalka Soomaaliyeed, iyadoo iskaashiga labada dal uu qeyb ka yahay dadaallada lagu xoojinayo awoodda Soomaaliya ee sugidda amniga, difaaca madax-bannaanida iyo la wareegidda mas’uuliyadda amniga qaranka.