Kenya, 11 Maarso 2026 (Dawan)– Ugu yaraan 49 qof ayaa ku dhintay, halka in ka badan 2600 qoys ay barakaceen kadib roobab mahiigaan ah oo sababay daadad ku dhuftay qaybo badan oo ka mid ah dalka Kenya, sida uu sheegay Booliska Kenya .
Bayaan uu Boolisku soo saaray Talaadadii ayaa lagu sheegay in roobabka xooggan ee billowday Jimcihii, 6 Maarso, ay geysteen khasaare ballaaran oo ka dhacay dhowr gobol, iyadoo caasimadda Nairobi ay ka mid tahay meelaha ugu daran ee roobku saameeyay.
Afhayeenka Booliska, Mushiri Nyaga, ayaa sheegay in ciidamada ammaanku ay kaashanayaan kooxaha gurmadka degdegga ah si ay u fuliyaan hawlgallo samatabixin, daad-gurayn iyo sugidda amniga ee meelaha ay daadadku saameeyeen.
“Kadib roobabkii xooganaa ee dalka ka da’ay 6 Maarso 2026, nasiib darro 49 qof ayaa ku naf waayay daadadka ka dhacay guud ahaan dalka,” ayuu yiri Nyaga, isaga oo tacsi u diray qoysaska iyo ehellada dhibbanayaasha.
Mas’uuliyiintu waxay sidoo kale sheegeen in 2624 qoys ay ku qasbanaadeen inay ka guuraan guryahooda kadib markii biyaha daadadku ku fataheen xaafado badan, taasoo burburisay guryo, waddooyin iyo kaabayaal muhiim ah.
Daadadku waxay saameeyeen ugu yaraan 16 xarumood oo Boolis, taasoo abuurtay caqabado dhanka hawlgalka ah, inkastoo Boolisku xaqiijiyeen in ay sii wadaan dadaallada lagu hubinayo in adeegyada ammaanku aysan hakad gelin.
Bayaan ka soo baxay Booliska ayaa lagu yiri: “Saraakiisheenna, iyagoo kaashanaya kooxo gurmad oo ka socda hay’ado kala duwan, ayaa weli ku sugan goobaha ay dhibaatadu ka jirto si ay u fuliyaan hawlgallada samatabixinta, daad-guraynta dadka iyo sugidda amniga.”
Dadaallada gurmadka oo la xoojiyay
