Tirada xulalka koobka Qaramada Afrika oo la kordhinayo

Daarusalaam (Dawan)- Guddoomiyaha Xiriirka Kubadda Cagta Afrika (CAF), Patrice Motsepe, ayaa sheegay in tirada xulalka ka qayb gala tartanka Koobka Qaramada Afrika in laga yaabo in la kordhiyo oo la gaarsiiyo 28 xul, isagoo sidoo kale xaqiijiyay in tartanka la qaban doono afartii sano mar mustaqbalka.

Motsepe ayaa arrintan ka sheegay shir jaraa’id oo ka dhacay magaalada Daarusalaam ee caasimadda Tansaaniya. Wuxuu intaa ku daray in qorshayaashan ay jiraan, balse aan weli la cayimin waqtiga rasmiga ah ee isbeddelka la dhaqangelin doono.

Tartamadii afartii sano ee u dambeeyay waxaa ka qayb galay 24 xul, kaddib markii tirada laga kordhiyay 16.

Guddoomiyuhu ma uusan faahfaahin sida afar xul oo dheeraad ah loogu dari doono nidaamka hadda ka kooban lix guruub oo min afar xul ah, inkastoo CAF ay ka kooban tahay 54 xiriir oo qaran, taasoo ka dhigan in 28 xul ay noqon doonaan in ka badan kala bar xubnaha.

Sidoo kale, Motsepe wuxuu mar kale ku celiyay in tartanka la qaban doono afartii sano mar wixii ka dambeeya 2028, iyada oo go’aan uu horay dhaliyay dhaliilo badan tan iyo markii markii ugu horreysay oo lagu dhawaaqay bishii Diseembar ee la soo dhaafay, iyadoo tartanka la qaban jiray labadii sano mar tan iyo 1968.