Washington (Dawan) – Madaxweynaha Maraykanka Donald Trump ayaa sheegay in xukuumaddiisu ay dib u eegayso arrinta aqoonsiga diblomaasiyadeed ee Somaliland, kaddib warbixino sheegaya in Somaliland ay muujisay diyaar u ahaanshaha inuu qaabilo Falastiiniyiinta ka barakacay Gaza haddii Maraykanku aqoonsado madaxbannaanideeda.
Su’aashan ayaa lagu waydiiyay shir jaraa’id oo ka dhacay Aqalka Cad Jimcihii (8-da Agoosto), halkaas oo Trump uu ku martigeliyay shir nabadeed hoggaamiyeyaasha Armenia iyo Azerbaijan.Su’aal: Waxaad ka hadashay dib-u-dejinta dadka reer Gaza. Dalka Somaliland wuxuu muujiyay xiisaha inuu qaabilo haddii aad aqoonsato madaxbannaanideeda. Ma u janjeertaa inaad sidaas samayso?
Trump: “Waxaan hadda eegaynaa taas, su’aal wanaagsan runtii; waa mid kale oo adag sida aad ogtahay, balse taas Somaliland hadda waan ka shaqaynaynaa.”
Jawaabta kooban ee Trump ayaa ka fogayd jawaab toos ah , balse waxay ahayd mar dhif ah oo uu si cad ugu hadlay Somaliland, oo ku dhawaaqday inay ka go’day Soomaaliya 1991, balse aan weli si caalami ah loo aqoonsan.
Soo jeedintan la sheegay waxay ku soo beegmaysaa xilli weerarada Gaza ay barakaciyeen kumannaan Falastiiniyiin ah.
Qaar ka mid ah siyaasiyiinta iyo diblomaasiyiinta ayaa soo jeediyey suurtagalnimada dib-u-dejinta dadkaas dalal saddexaad, balse qorshahaas waxaa si cad uga soo horjeestay dowlado Carbeed iyagoo sheegaya inuu wiiqi karo xuquuqda Falastiiniyiinta ee ku laabashada dhulkooda.
Dowladda Maraykanka weli ma xaqiijin inay jiraan wada-xaajoodyo rasmi ah oo ay la leedahay Somaliland oo ku saabsan aqoonsi ama dib-u-dejinta. Dowladda Federaalka Soomaaliya ayaa marar badan caddeysay in Somaliland ay qayb ka tahay Soomaaliya isla markaana ay ka soo horjeeddo tallaabo kasta oo loo qaado aqoonsigeeda.