Muqdisho (Dawan) – Wafdi heer sare ah oo ka socda dowladda Turkiga ayaa la filayaa inuu toddobaadkan soo gaaro Muqdisho, si uu u bilaabo dadaallo dhexdhexaadin ah oo u dhexeeya Dowladda Federaalka Soomaaliya iyo siyaasiyiinta mucaaradka ee ku sugan caasimadda, sida ay Dawan u xaqiijiyeen ilo diblomaasiyadeed oo xog-ogaal ah.
Wafdiga Turkiga, oo ay ku jiraan diblomaasiyiin iyo saraakiil ka tirsan hay’adaha sirdoonka, ayaa lagu wadaa inuu kulamo gaar-gaar ah la yeesho madaxda Dowladda Federaalka iyo xubnaha mucaaradka. Ankara ayaa la filayaa inay si rasmi ah u bilowdo dadaallo lagu dejinayo xiisadda siyaasadeed ee ka taagan Muqdisho.
Sida ay ilo xog-ogaal ah u xaqiijiyeen Dawan, dhaqdhaqaaqan ayaa daba socda kulan bishii hore ka dhacay magaalada Istanbul, kaas oo ay ka qeyb galeen wakiillo ka socday mucaaradka Soomaaliya. Ilo ku dhow kulanka ayaa sheegay in xubnihii mucaaradka ee ka qeyb galay ay aqbaleen in Turkigu door dhexdhexaadin ah ka qaato khilaafka siyaasadeed ee u dhexeeya dhinacyada isku haya arrimaha siyaasadda Soomaaliya.
