UNSOS iyo UK oo ka wada hadlay xoojinta taageerada Ciidamada Ammaanka Soomaaliya iyo AUSSOM

Muqdisho (Dawan) – Hay’adda Taageerada Qaramada Midoobay ee Soomaaliya (UNSOS) iyo dowladda Boqortooyada Ingiriiska (UK) ayaa ka wada hadlay xoojinta taageerada la siiyo Ciidamada Ammaanka Soomaaliya iyo Hawlgalka Taageerada iyo Xasilinta Midowga Afrika ee Soomaaliya (AUSSOM), iyagoo adkeeyay muhiimadda ay leedahay taageero joogto ah oo lagu sii wadi karo hawlgallada amniga iyo dhismaha awoodda ciidamada Soomaaliyeed.

Kulankan ayaa Khamiistii dhex maray Ku-simaha Kaaliyaha Xoghayaha Guud ee Qaramada Midoobay ahna Madaxa UNSOS, Marwo Qurat-ul-Ain Sadozai, iyo Safiirka Boqortooyada Ingiriiska ee Soomaaliya, Charles King.

Intii uu kulanku socday, labada dhinac ayaa diiradda saaray iskaashiga ka dhexeeya UNSOS iyo dowladda UK, iyagoo sidoo kale dib u eegis ku sameeyay horumarka laga gaaray Sanduuqa Taageerada Ciidamada Ammaanka Soomaaliya (SSF Trust Fund).

Waxa ay labada mas’uul isla qaateen muhiimadda ay leedahay taageerada saadka iyo hawlgallada ee ay UNSOS siiso Hawlgalka AUSSOM iyo Ciidamada Ammaanka Soomaaliya, kuwaas oo door muhiim ah ka qaata sugidda amniga dalka iyo la dagaallanka kooxaha hubeysan.

Madaxa UNSOS, Marwo Qurat-ul-Ain Sadozai, ayaa uga mahadcelisay dowladda UK taageerada joogtada ah ee ay ku bixiso Sanduuqa SSF Trust Fund, iyadoo sheegtay in sanduuqan uu door weyn ka qaato horumarinta iyo tayeynta hay’adaha ammaanka Soomaaliya.

Dowladda Boqortooyada Ingiriiska ayaa ka mid ah saaxiibbada ugu muhiimsan ee Soomaaliya ka taageera dhinacyada amniga, dib-u-dhiska hay’adaha dowladda iyo horumarinta ciidamada qaranka.

Labada dhinac ayaa ugu dambeyn carrabka ku adkeeyay muhiimadda iskaashiga caalamiga ah ee lagu taageerayo dadaallada Soomaaliya ee ku aaddan sugidda amniga, xasiloonida dalka iyo dhismaha hay’ado amni oo awood u leh inay si madax-bannaan u gutaan waajibaadkooda.