Muqdisho (Dawan) — Soomaaliya ayaa waddo dadaallo ay ku raadinayso gargaar caalami ah oo wax looga qabanayo baahiyaha bani’aadantinimo ee ka jira dalka. Guddoomiyaha Hay’adda Maareynta Musiibooyinka Qaranka (SoDMA), Maxamuud Macallin Cabdulle, ayaa sheegay in dowladaha Shiinaha, Masar, Ukraine, Qatar, Türkiye iyo Sacuudiga ay ka mid yihiin dalalka Soomaaliya ay ka filayso taageero.
Maxamuud Macallin oo hadalkan ka sheegay barnaamijka Miizan Podcast ee ka baxa Dawan, ayaa sheegay in Soomaaliya ay Shiinaha ka filayso 2,900 tan oo raashin ah, kuwaas oo la filayo in dalka la soo gaarsiiyo maalmaha soo socda.
Sidoo kale, guddoomiyaha SoDMA ayaa sheegay in Soomaaliya ay Masar ka filayso 120 tan oo raashin ah, iyadoo labada dal ay ka mid yihiin dowladaha taageerada ka geysta dadaallada wax looga qabanayo baahiyaha bani’aadantinimo ee Soomaaliya.
Dhanka kale, Maxamuud Macallin ayaa sheegay in Ukraine ay Soomaaliya u samaysay ballanqaad gargaar, inkastoo uusan faahfaahin ka bixin nooca iyo xaddiga taageerada la filayo.
Guddoomiyaha SoDMA ayaa sidoo kale tilmaamay in Soomaaliya ay rajo ka qabto in gargaar uga yimaado Qatar, Türkiye iyo Sacuudiga, isagoo sheegay in dowladahaasi ay hay’ado ka howlgala dalalkooda u wakiisheen arrimaha gargaarka.
