Shabeellaha Dhexe (Dawan) – Dowladda Federaalka Soomaaliya ayaa sheegtay in howlgal duqeyn ah oo ku saleysnaa xog sirdoon lagu dilay 11 horjooge oo ka tirsan Al-Shabaab, kaddib markii la beegsaday kulan ay ku lahaayeen guri ku yaal degmada Aadan Yabaal ee gobolka Shabeellaha Dhexe. Dowladda ayaa ku tilmaantay howlgalka mid ka mid ah guulihii ugu waaweynaa ee bilihii u dambeeyay laga gaaray kooxda.
Wasiirka Gaashaandhigga Soomaaliya, Axmed Macallin Fiqi, ayaa shir jaraa’id oo uu ku qabtay magaalada Galkacyo ku sheegay in duqeynta la fuliyay 27-kii July, ayna fuliyeen Ciidanka Xoogga Dalka Soomaaliyeed oo kaashanaya saaxiibada caalamiga ah, kaddib markii xog sirdoon ay muujisay in saraakiil sare oo Al-Shabaab ah ay ku shirsanaayeen deegaanka u dhow Aadan Yabaal.
Sida uu sheegay wasiirku, horjoogayaasha lagu dilay duqeynta ayaa kala ahaa:
- Macallin Carab, oo dowladda ku sheegtay madaxa sirdoonka Al-Shabaab ee Galgaduud.
- Sheekh Cabdullaahi Maxamuud (Abuu Jilabow), ku-xigeenka maamulka Al-Shabaab ee Aadan Yabaal.
- Macallin Sakariye, madaxa amniga Al-Shabaab ee Hiiraan.
- Suldaan Cali Muuse, Naqiib Sheekh Cumar Xaashi iyo Naqiib Axmed Hashin, oo kooxda u qaabilsanaa arrimaha beelaha.
- Salmaan Dheer, madaxa garaashyada gaadiidka Al-Shabaab ee Shabeellaha Dhexe.
- Cabdifitaax iyo Xaashi, oo dowladda sheegtay inay ahaayeen ilaaladii gaarka ahayd ee Yuusuf Ciise Kaba Kutukade.
- Macallin Sulay, oo lagu tilmaamay taliye ciidan.
- Xudeyfa, oo ka tirsanaa waaxda dacwada Al-Shabaab.
Wasiir Fiqi ayaa sidoo kale sheegay in afar xubnood oo kale oo sare ay ku dhaawacmeen duqeynta. Kuwaas waxaa ka mid ah Yuusuf Ciise Kaba Kutukade, oo ah guddoomiyaha Al-Shabaab ee gobolka Shabeellaha Dhexe, Cali Dhuux, Cali Yare iyo Usaama, kuwaas oo uu ku tilmaamay masuuliyiin sare oo kooxda u qaabilsanaa maamulka, maaliyadda iyo canshuuraha.
