Waa kuma Ururada hubeysan ee ku dhawaaqay inay ka mid yihiin Isbahaysi ka dhan ah Xukuumadda Itoobiya?

Dhaqdhaqaaqa Xoreynta Shacabka Benishangul

Dhaqdhaqaaqa Dimuqraadiga Shacabka Gumuz

Isbahaysigu wuxuu xukuumadda Itoobiya ku eedeeyay inay dalka gelisay dagaallo, barakac, saboolnimo iyo xaalad amni-darro. Waxa kale oo uu ku dooday in sharciga iyo kala dambayntu ay wiiqmeen, isla markaana Itoobiya ay lumisay qayb ka mid ah saamaynteedii siyaasadeed iyo diblomaasiyadeed ee heer gobol iyo heer caalami.

Isbahaysigu wuxuu sheegay in haddii meesha laga saaro nidaamka hadda jira, mudnaanta koowaad ay siin doonaan joojinta dagaallada, ilaalinta amniga, dammaanad-qaadka xuquuqda aadanaha iyo dimuqraadiyadda, xasilinta xaaladda dhaqaale iyo bulsho, iyo hagaajinta xiriirka Itoobiya ay la leedahay dalalka deriska ah.

Waxa kale oo uu ku baaqay in la qabto wadahadal qaran iyo mid dastuuri ah oo loo dhan yahay, kaas oo shacabka Itoobiya ay si toos ah uga qaybqaataan, lagana arrinsado khilaafaadka waaweyn ee siyaasadeed iyo kuwa mustaqbalka.

Isbahaysiga Badbaadada ayaa ciidamada dowladda Itoobiya ugu baaqay inay ka baxaan safka xukuumadda, kuna biiraan waxa uu ugu yeeray “halganka lagu badbaadinayo shacabka iyo dalka.” Waxa uu sidoo kale ururrada bulshada rayidka ah iyo kooxaha siyaasadeed ku boorriyay inay taageeraan ujeeddooyinkiisa.

Dalalka deriska ah, kuwa Afrika iyo beesha caalamka ayuu isbahaysigu ka dalbaday inay garab istaagaan shacabka Itoobiya, caddaaladda iyo dimuqraadiyadda.

Ku dhawaaqista isbahaysigan ayaa imaanaysa xilli Itoobiya ay weli la tacaalayso khilaafaad siyaasadeed, colaado hubeysan iyo xiisado u dhexeeya dowladda federaalka iyo kooxo hubeysan oo ka jira qaybo kala duwan oo dalkaas ah.