Shabeellaha Hoose (Dawan) – Maamulka Gobolka Shabeellaha Hoose ayaa si rasmi ah u daahfuray hannaan cusub oo casri ah oo mushaaraadka shaqaalaha maamulka gobolka lagu marinayo bangiyada, kaas oo noqday kii ugu horreeyay ee noociisa ah muddo 35 sano ah.
Sida uu baahiyay Telefishinka Qaranka Soomaaliyeed, nidaamkan ayaa qayb ka ah dadaallada lagu casriyeynayo adeegyada dowladda, laguna xoojinayo hufnaanta, daahfurnaanta iyo isla xisaabtanka maamulka gobolka.
Mas'uuliyiin ka tirsan maamulka gobolka, oo ay ku jiraan qaar ka mid ah guddoomiye ku-xigeennada gobolka iyo guddoomiyeyaasha degmooyinka, ayaa sheegay in hirgelinta nidaamkan ay saldhig u tahay qorshe ballaaran oo lagu casriyeynayo maamulka gobolka, isla markaana lagu hagaajinayo hannaanka maamulka maaliyadda.
Guddoomiyaha Gobolka Shabeellaha Hoose, Cabdifitaax Cabdi Axmed, ayaa sheegay in daahfurka nidaamkan uu yahay guul taariikhi ah oo uu maamulka gobolka gaaray, isagoo xusay in muddo 35 sano ah kaddib dib loo habeeyay hannaanka maamulka iyo maaliyadda gobolka.
