Muqdisho (Dawan ) — Maareeyaha Dekadda Muqdisho, Maxamed Cali Nuur Americo, ayaa ku dhawaaqay qorshe cusub oo lagu hagaajinayo habka xog-helidda dekadda, kaas oo ujeedadiisu tahay in la daahfuro xogta ku saabsan badeecadaha soo gala iyo kuwa ka baxa dekadda bil kasta, iyo sidoo kale dakhliga dowladda ka soo xarooday adeegyada dekadda.
Hadalkan ayuu Maareeyuhu sheegay, xilli uu marti ku ahaa barnaamijka Miizaan Podcast ee ka baxa Dawan TV.
"Hadda waxaan wadnaa oo maalmaha soo socda aan daahfuri doonaa website ay dekaddu leedahay oo aan rabno inaan wax kasta oo macluumaad ah oo ay dekaddu leedahay aan ku soo qorno.” Ayuu yiri Maareeyaha dekadda
Waxa uu intaas raaciyay, in qorshahan cusub uusan ahayn mid ku kooban xogta sanadlaha balse waxaa lagu daabici doonaa xogta bil kasta ee badeecadaha dalka soo gala, sida raashinka iyo shidaalka, iyo sidoo kale alaabta ka baxda dalka, oo ay ka mid yihiin xoolaha, sisinta, liinta, iyo mooska.
