Soomaaliya (Dawan) – Walaac cusub ayaa ka dhashay xeebaha Soomaaliya kadib markii maraakiib dhowr ah lagu afduubtay biyaha u dhow Puntland, taasoo sare u qaaday cabsida laga qabo in burcad-badeedda xeebaha Soomaaliya ay mar kale dib ugu soo laabanayaan marinnada ganacsiga ee muhiimka ah.
Markab xamuul oo siday sibidh, kuna socday magaalada Mombasa ee Kenya, ayaa lagu afduubtay meel u dhow xeebta Garacad ee Dowlad-goboleedka Puntland, sida ay sheegtay wakaaladda wararka AP oo soo xigatay mas’uul amni-badeed oo deegaanka ah. Markabka ayaa watay calanka St. Kitts and Nevis, waxaana la sheegay in sagaal nin oo hubeysan ay la wareegeen.
Afduubkan ayaa yimid maalmo kadib markii markab shidaal siday oo ka soo baxay dekedda Berbera, kuna sii jeeday Muqdisho, lagu afduubtay xeebaha waqooyi-bari Soomaaliya, meel u dhaxeysa Xaafuun iyo Bandarbayla.
Wakaaladda AP ayaa sheegtay in lix nin oo hubeysan ay la wareegeen markabkaas, iyadoo Hay’adda Hawlgallada Ganacsiga Badaha ee Boqortooyada Ingiriiska ay xaqiijisay in dad aan garanin markabka u wateen dhinaca koonfureed ee biyaha Soomaaliya.
Warbixinnada amniga badda ayaa sidoo kale sheegay in ugu yaraan saddex markab lagu bartilmaameedsaday afduubyo toddobaad gudihiis, taasoo muujinaysa koror degdeg ah oo ku yimid dhaqdhaqaaqyada burcad-badeedda ee xeebaha Soomaaliya.
The Guardian ayaa ku warrantay in dhacdooyinkan ay bilaabmeen 21-kii Abriil, markii la afduubtay markabka Honour 25, kadibna ay xigtay doon kale iyo markab ganacsi oo lagu magacaabo Sward.
