Laascaanood (Dawan)– Wasiirka Amniga Dowlad-goboleedka Waqooyi Bari Soomaaliya, Cabdirisaaq Faarax Warsame, ayaa beeniyay warar sheegayay in gaadiid xamuul ah ay gudbeen waddada isku xirta Oog iyo Laascaanood, oo xirnayd tan iyo dagaalladii 2023-kii.
Wasiirka oo shir jaraa’id qabtay maanta ayaa sheegay in afar gaari ay habeenkii Isniinta, abbaaraha 9:00 fiidnimo, ka soo muuqdeen aagga jiidda hore ee ciidamada Waqooyi Bari, balse ciidamada ammaanku ay qabteen ka hor inta aysan sii gudbin.
“Afarta gaari waa la qabtay, dadkii watayna way noo xiran yihiin. Dacaayadda la faafiyay ee sheegaysa in gaadiidku gudbay waxba kama jiraan,” ayuu yiri Wasiir Warsame.
Wuxuu sheegay in sagaal qof oo la socday gaadiidka la xiray, halka baabuurtana ay gacanta ku hayaan ciidamada ammaanka. Wasiirka ayaa intaas ku daray in dadka la qabtay la horgeyn doono hay’adaha sharciga si looga qaado tallaabada ku habboon. Cabdirisaaq Warsame ayaa sheegay in maamulka iyo ciidamada ammaanku ay horay uga warhayeen dhaqdhaqaaqa gaadiidka iyo qorshaha lagu doonayay in lagu maro waddada. Wuxuu ku adkaystay in waddada Oog–Laascaanood aysan u furnayn isu-socodka ka imanaya dhinaca Somaliland.