Waqooyi Bari oo laga hirgeliyay xaruntii ugu horreysay ee gurmadka degdegga ah

Laascaanood (Dawan) – Maamulka Waqooyi Bari ayaa helay xaruntiisii ugu horreysay ee gurmadka degdegga ah, kaddib markii Hay’adda Maareynta Musiibooyinka Qaranka (SoDMA) iyo Dowladda Shiinaha ay iska kaashadeen dhismaha xarunta cusub.

Guddoomiyaha Hay’adda Maareynta Musiibooyinka Qaranka (SoDMA) Maxamuud Macallin Cabdulle, iyo Wasiirka Gargaarka iyo Maareynta Musiibooyinka Dowlad Goboleedka Waqooyi Bari, Maxamed Diiriye Shariif,ayaa si wadajir ah xarigga uga jaray xarunta cusub ee Wasaaradda Gargaarka iyo Maareynta Musiibooyinka ee Maamulka Waqooyi Bari.

Xaruntan ayaa noqonaysa xaruntii ugu horreysay ee gurmadka degdegga ah ee Maamulka Waqooyi Bari, iyadoo dhismaheeda ay iska kaashadeen SoDMA iyo Dowladda Shiinaha.

Hirgelinta xarunta ayaa qeyb ka ah qorshe lagu xoojinayo adeegyada gurmadka iyo maareynta musiibooyinka, iyadoo la fulinayo amarkii Ra’iisul Wasaaraha Soomaaliya, Xamse Cabdi Barre.

Guddoomiyaha SoDMA ayaa sheegay in xaruntan ay tahay qeybta koowaad ee mashruuc ballaaran oo hay’addu doonayso inay ka hirgeliso Maamulka Waqooyi Bari.

“Mashruucaan wuxuu kamid yahay mashruuc weyn oo ballaaran oo aan doonayno in laga fuliyo Maamulka Waqooyi Bari, oo qeybtiisa koowaad ay hadda qabsoontay; qeybihii kale oo keydadkii ahna way ku xigaan,” ayuu yiri Guddoomiyaha SoDMA.

Munaasabadda ayaa sidoo kale lagu daahfuray Barnaamijka Gargaarka iyo Ka Jawaabista Abaaraha ee Maamulka Waqooyi Bari, kaas oo laga fulin doono degmooyinka ka tirsan gobollada Sanaag, Sool iyo Togdheer.

Barnaamijkan ayaa qeyb ka ah dadaallada lagu xoojinayo gurmadka iyo ka jawaabista xaaladaha abaaraha ee ka jira deegaanada Maamulka Waqooyi Bari.

Ra’iisul Wasaaraha Soomaaliya ayaa horey u sheegay in Maamulka Waqooyi Bari laga hirgelin doono ilaa siddeed xarumood oo muhiim u ah adeegyada dowladda.

Furitaanka xaruntan ayaa ku soo beegmaya xilli Maamulka Waqooyi Bari uu yahay maamul cusub, iyadoo xaruntani ay ka mid tahay xarumaha ugu horreeya ee loo hirgeliyo adeegyada gurmadka iyo maareynta musiibooyinka.