Wasaaradda Beeraha oo xarig-jareysa dhisme cusub oo lagu xoojinayo adeegyada beeraha

Muqdisho (Dawan)- Wasaaradda Beeraha iyo Waraabka ee Dowladda Federaalka Soomaaliya ayaa maanta xarig-jareysa dhisme cusub oo si casri ah loo dhisay, kaas oo lagu hirgeliyay Mashruuca Xoojinta Adkeysiga Nidaamka Cunnada Soomaaliya (FSRP). Dhismahan ayaa qayb ka ah dadaallada lagu xoojinayo awoodda hay’adaha dowladda ee ka shaqeeya horumarinta beeraha, waraabka iyo adkeysiga nidaamka cunnada dalka.

Wasiirka Beeraha iyo Waraabka, Maxamed Cabdi Xayir (Maareeye), ayaa sheegay in dhismahan cusub loo qorsheeyay in lagu ballaariyo howlaha muhiimka ah ee Wasaaradda, gaar ahaan kuwa la xiriira horumarinta wax-soo-saarka beeraha, maaraynta waraabka, bixinta adeegyada farsamo iyo isku-dubaridka mashaariicda lagu taageerayo beeraleyda Soomaaliyeed.

Mashruuca FSRP waa barnaamij heer gobol ah oo uu taageero Bangiga Adduunka, waxaana ujeeddadiisu tahay in la kordhiyo adkeysiga nidaamyada cunnada, isla markaana loo diyaargaroobo caqabadaha ay ka mid yihiin cunto-yarida, abaaraha, isbeddelka cimilada iyo dhibaatooyinka saameeya wax-soo-saarka beeraha.

Sida ku cad qorshaha iibsiga ee Bangiga Adduunka, qiimaha lagu dhisay xarunta cusub ee Wasaaradda Beeraha iyo Waraabka ayaa lagu qiyaasay 1.4 milyan oo doollar, iyadoo maalgelinta ay bixisay Hay’adda Horumarinta Caalamiga ah (IDA), oo ka tirsan Bangiga Adduunka. Qandaraaska dhismahan ayaa qayb ka ahaa maamulka Mashruuca FSRP.

Xarig-jarka dhismahan cusub ayaa loo arkaa tallaabo muhiim ah oo lagu xoojinayo dib-u-dhiska hay’adaha dowladda, isla markaana kor loogu qaadayo awoodda Wasaaradda ee qorsheynta, kormeerka iyo hirgelinta siyaasadaha lagu horumarinayo beeraha iyo waraabka Soomaaliya.