Muqdisho (Dawan) — Wasiirka Dhallinyarada iyo Ciyaaraha Soomaaliya, Maxamed Cabdulqaadir, ayaa sheegay in loo baahan yahay dib-u-eegis lagu sameeyo xeerarka iyo qaab-dhismeedka sharci ee Guddiga Olombikada Soomaaliyeed, si loo waafajiyo xaaladda maanta jirta loona xoojiyo hufnaanta maamulka ciyaaraha dalka.
Wasiirka oo wareysi siiyay barnaamijka Miizaan Podcast ee Dawan Media ayaa sheegay in sharciga lagu dhisay Guddiga Olombikada Soomaaliyeed iyo xeer-hoosaadyada hagaya ay u baahan yihiin in dib loo eego, si loo hubiyo inay ku saleysan yihiin caddaalad, daahfurnaan iyo ka-qaybgal dhab ah.
Maxamed Cabdulqaadir ayaa su’aal geliyay qaar ka mid ah qodobbada ku jira xeerarka guddiga, isaga oo tilmaamay in ay jiraan kala duwanaansho u dhexeeya nuqullada Af-Soomaaliga iyo Ingiriisiga ee dukumentiyada hagaya hay’adda, taas oo u baahan in si cad loo qeexo.
Wasiirka ayaa sheegay in Guddiga Olombikada Soomaaliyeed la aas-aasay xilli ay hay’adaha dowladdu ahaayeen kuwo tabar-darro ku jiray, isla markaana ciyaaruhu ay door muhiim ah ka qaateen isu keenidda bulshada Soomaaliyeed kaddib sannado badan oo colaado ah.
"Nidaamka ciyaaraha waa inuu u adeegaa dhammaan shacabka Soomaaliyeed si siman, isla markaana uu ku shaqeeyo hufnaan iyo daacadnimo." ayuu yiri wasiirka.
Wuxuu carrabka ku adkeeyay in nidaamka ciyaaraha uu yahay inuu si siman ugu adeeggo dhammaan shacabka Soomaaliyeed, isla markaana lagu saleeyo hufnaan iyo daacadnimo.
