Wasiirka Dekedaha oo xubin ka noqday Golaha Shacabka

Baydhabo, April 7 (Dawan) — Guddiga Madaxa Bannaan ee Doorashooyinka Qaranka iyo Soohdimaha ayaa shaaciyay maanta oo Talaado ah in Wasiirka Dekedaha iyo Gaadiidka Badda, Cabdulqaadir Maxamed Nuur, uu ku guuleystay kursiga tirsigiisu yahay HOP#204 ee Golaha Shacabka, kadib doorasho ka dhacday magaalada Baydhabo.

Guddiga ayaa sheegay in kursigaasi uu bannaanaa, isla markaana wasiirka loo doortay kadib markii musharraxii la tartamayay, Cabdirisaaq Cabdullaahi, uu ka tanaasulay tartanka.

Doorashada ayaa ka dhacday Baydhabo, oo ah xarunta ku meel gaarka ah ee Koonfur Galbeed oo baryahaan buuq siyasadeed oo weyn ku jirtay.

Si kastaba ha ahaatee, Isaaq Cali Subag, oo sheegay inuu hore kursiga ku fadhiyay, ayaa diiday natiijada doorashada, isagoo ku dooday in kursiga uusan bannaanayn, islamarkaana ay jirto faragelin siyaasadeed.

“Waxaan caddeynayaa in kursigii aan ku fadhiyay la iga qaaday,” ayuu ku yiri qoraal uu ku baahiyay barta WhatsApp ee Golaha Shacabka iyo waraysiyo uu siiyay warbaahinta maxalliga ah.

Ma jirin jawaab degdeg ah oo ka timid guddiga ama mas’uuliyiin kale oo ku saabsan eedeymahaas.

Dhankiisa, Cabdulqaadir Maxamed Nuur ayaa u mahadceliyay odayaasha dhaqanka, culimada iyo bulshada taageertay, isagoo ballanqaaday inuu u adeegi doono danta guud ee qaranka iyo tan dowlad goboleedka.

Wasiir Cabdulqaadir, oo hore u soo noqday Wasiirka Gaashaandhigga, haddana ah Wasiirka Dekedaha, waxaa loo arkaa mid ka mid ah xulafada dhow ee Madaxweyne Xasan Sheekh Maxamuud.

Doorashadan ayaa imanaysa iyadoo Baydhabo uu dhawaan ka dhacay isbeddel siyaasadeed oo ka dhashay khilaaf u dhexeeyay Dowladda Federaalka iyo hoggaankii hore ee Koonfur Galbeed, kaas oo sababay in uu ugu dambeyn is casilo madaxweynihii hore Cabdicasiis Maxamed Xasan Lafta Gareen.

Wasiir Cabdulqaadir ayaa laba maalmood ka hor gaaray magaalada Baydhabo, halkaas oo ay ku sugan yihiin madaxda ugu sarreysa ee Dowladda Federaalka ee heerarkeeda kala duwan.

Doorashadan ayaa ku soo beegmaysa iyadoo nidaamka doorashooyinka dadban ee Soomaaliya uu marar badan la kulmo dhaliilo la xiriira hufnaan la’aan iyo eedeymo faragelin siyaasadeed.