Muqdisho (Dawan) – Wasiirka Wasaaradda Qoyska iyo Horumarinta Xuquuqul Insaanka XFS, Amb. Khadiija Maxamed Al-Makhzoumi, ayaa maanta Golaha Shacabka Baarlamaanka Federaalka Soomaaliya ka hor akhrisay laba hindise sharciyeed oo muhiim u ah bulshada Soomaaliyeed, kuwaas oo kala ah Hindise Sharciyeedka Sharciga Arrimaha Qoyska iyo Hindise Sharciyeedka Xuquuqda Carruurta, sida ay sheegtay Wasaaradda Qoyska iyo Horumarinta Xuquuqul Insaanka.
Wasiirka ayaa sheegtay in labada hindise sharciyeed ay ka jawaabayaan baahiyo muhiim ah oo la xiriira ilaalinta qoyska, daryeelka carruurta iyo dhowrista xuquuqdooda, iyadoo ay tahay in Golaha Shacabku ka gutaan waajibaadkooda dastuuriga ah ee ka doodista iyo ansixinta sharciyada.
Waxay tilmaantay in Hindise Sharciyeedka Arrimaha Qoyska uu gacan ka geysan karo xal u helidda caqabadaha iyo khilaafaadka saameeya qoysaska Soomaaliyeed, iyadoo si gaar ah loo ilaalinayo carruurta nugul ee la kulma dayac ama dhibaatooyin kala duwan.
