Muqdisho (Dawan ) – Wasaaradda Waxbarashada, Hiddaha iyo Tacliinta Sare ee Dowladda Koonfur Galbeed ayaa maanta shaacisay fasax ku-meel-gaar ah oo la siiyay dhammaan goobaha waxbarashada ee loo asteeyey in lagu qabto doorashada deegaanka ee Koonfur Galbeed, sida ay sheegtay war-saxaafadeed kasoo baxay wasaaradda.
Fasaxa ayaa bilaabanaya maalinta Arbacada ee 6-da May 2026, waxaana la qorsheeyay inuu socdo ilaa 10-ka May 2026, si loo fududeeyo diyaarinta iyo qabsoomidda howlaha doorashada. Mudadaas, dhammaan howlaha waxbarasho ee ka socda goobaha la fasaxay waa la hakiyay, waxaana la filayaa in la dib u bilaabo marka lasoo gabagabeeyo doorashada.
Wasaaradda Waxbarashada ayaa ka mahadcelisay wada-shaqeynta ay la leedahay bahda waxbarashada, iyadoo ku boorrisay in la sameeyo diyaar-garow dhab ah oo loogu adeegayo bulshada iyo horumarinta nidaamka doorashooyinka.
