Xaaladda maxaabiista Soomaaliyeed oo laga wada hadlay

Muqdisho (Dawan) – Guddiga Madaxa-bannaan ee Xuquuqul Insaanka Qaranka iyo Wasaaradda Cadaaladda iyo Arrimaha Dastuurka ayaa ka wada hadlay xaaladaha maxaabiista iyo sidii loo xoojin lahaa ilaalinta xuquuqdooda, sida lagu sheegay bayaan rasmi ah.

Kulanka ayaa dhex maray Guddoomiyaha Guddiga Xuquuqul Insaanka, Maryam Qasim Axmed, iyo Wasiirka Cadaaladda, Xasan Macallin Maxamuud, waxaana lagu qabtay xafiiska wasaaradda ee Muqdisho Isniintii.

Sida lagu sheegay bayaanka, labada dhinac ayaa diiradda saaray xoojinta iskaashiga istiraatiijiga ah, gaar ahaan dhinacyada ilaalinta iyo horumarinta xuquuqda aadanaha.

Wadahadallada ayaa si gaar ah uga hadlay xaaladaha maxaabiista, kor u qaadidda ilaalinta xuquuqdooda, iyo horumarinta nidaamka cadaaladeed ee la xiriira carruurta iyo dadka nugul ee la macaamila nidaamka garsoorka.

Soomaaliya ma laha tiro rasmi ah oo mideysan oo ku saabsan guud ahaan maxaabiista dalka, iyadoo xogta ay kala duwan tahay kana timaaddo hay’ado kala duwan. Si kastaba ha ahaatee, qiyaaso ay sameeyeen hay’ado caalami ah intii u dhaxeysay 2018 ilaa 2022 ayaa muujinaya in tirada maxaabiista ay gaari karto tobanaan kun, iyadoo ay jiraan caqabado la xiriira diiwaangelin aan mideysnayn iyo kala duwanaanshaha xabsiyada federaalka iyo kuwa dowlad-goboleedyada.

Labada dhinac ayaa sidoo kale isla gartay muhiimadda ay leedahay in la xoojiyo wada-shaqeynta hay’adaha dowladda si loo hubiyo in nidaamka cadaaladda uu waafaqsan yahay heerarka qaran iyo kuwa caalamiga ah ee xuquuqda aadanaha.

Waxay sidoo kale ku heshiiyeen in la kordhiyo kormeerka xabsiyada iyo in la hirgeliyo barnaamijyo wadajir ah oo lagu horumarinayo nidaam cadaaladeed oo dhowra karaamada iyo xuquuqda aadanaha.