3-November 2025 — Ra’iisul Wasaaraha Soomaaliya Xamse Cabdi Barre ayaa amar ku bixiyay in si degdeg ah loo fududeeyo qaadashada kaarka aqoonsiga qaranka, kaddib markii uu kormeeray xarunta NIRA ee degmada Hodan oo maalmahan laga soo sheegayay safaf dhaadheer iyo dhibaato dadka heysata.
Ra’iisul Wasaaruhu wuxuu si gaar ah uga hadlay xaaladda haweenka iyo gabdhaha lagu arkay iyadoo habeenkii ay seexdaan meelaha hortooda xarumaha qaadashada kaarka, si ay uga mid noqdaan dadka safka hore.
“Hablaha Soomaaliyeed waa in la daryeelaa. ya lagu qasbin inay habeenkii ay messha seexdaan — waa ceeb, amnigoodana khatar ayey ku tahay,” ayuu yiri Ra’iisul Wasaare Xamse.
Xamse ayaa NIRA ku amray in si cad loo kala saaro dadka cusub ee isdiiwaangelinaya iyo dadka horey u isdiiwaangeliyay ee u yimid inay kaarka qaataan, si aan mar kale loogu celin nidaamkii hore.
“Diiwaangelinta iyo qaadashada kaarka waa in la kala saaraa. Qofka isdiiwaangeliyay waa inuu maalinta uu imaanayo si fudud u qaataa kaarkiisa, oo uusan saf dheer mar labaad u gelin,” ayuu yiri xamse
Hay’adda NIRA ayaa horey u shaacisay in muddada lagu bixinayo kaarka aqoonsiga iyadoo lacag la’aan ah ay ku eg tahay 31-ka November 2025, wixii ka dambeeyana lacag laga qaadi doono.
Ra’iisul Wasaare Xamse ayaa shacabka uga mahadceliyay sida ay u garteen muhiimadda kaarka aqoonsiga qaranka, isagoo sheegay in ay nolosha ku xirnan doonto sida ganacsiga, waxbarashada, safarka, iyo helitaanka adeegyada aas-aaska ah.
Booqashadan ayaa timid kaddib markii baraha bulshada lagu faafiyay sawirro muujinaya hooyooyin iyo gabdho ku hoyanaya banaanka xarumaha, si ay u sugaan diiwaangelinta subaxii hore — arrin dhalisay dood weyn iyo walaac amni.