Xamse: Doorashadu way ka dhici doontaa Jubaland inta ay suurtagal tahay

Wuxuu sheegay in codbixinta laga qaban doono dhammaan goobaha ay suurtagalka tahay, balse ay jiraan deegaanno ay duruufaha jira caqabad ku noqon karaan qabashada doorashada.

Xamse wuxuu soo hadal qaaday Jilib, Bu’aale, Xagar, Jamaame iyo Badhaadhe, isagoo sheegay in haddii doorashadu ka dhici weydo deegaannadaas iyo meelaha kale ee ay duruufuhu saamixi waayaan, loo adeegsan doono hannaanka doorashada ee loogu talagalay xaaladahaas.

Ra’iisul Wasaaraha ayaa sheegay in nidaamka “single constituency” uu leeyahay hab lagu maareyn karo xaaladaha codbixintu aanay ka qabsoomin deegaannada qaarkood.

Wuxuu tusaale u soo qaatay Ciraaq iyo Afghanistan, isagoo sheegay in markii doorashooyinka laga qabanayay dalalkaas ay jireen deegaanno aan codbixintu ka dhicin, balse loo helay habab lagu maareeyo.

Xamse ayaa sidoo kale ka hadlay xaaladda Waqooyi Bari, isagoo sheegay in diiwaangelinta dadka iyo doorashooyinka dowladaha hoose ay halkaas ka dhacayaan, halka madaxda iyo baarlamaankuna ay weli haystaan muddo-xileedkooda. Puntland ayuu sheegay inay leedahay xaalad ka duwan tan maamullada kale.

Hadalka Ra’iisul Wasaaraha ayaa muujinaya in dowladda federaalku qorsheyneyso in doorashada laga hirgeliyo deegaannada Jubaland ee ay suurtagalka tahay, inkastoo uu weli jiro khilaaf siyaasadeed oo u dhexeeya dowladda federaalka iyo maamulka Jubaland.