Xamse oo amray in shahaadooyin la siiyo 28 kun oo arday oo ka baaqday imtixaankii 2015/2016

Muqdisho, 14 December 2025 (Dawan)- Ra’iisul Wasaaraha Soomaaliya, Xamse Cabdi Barre, ayaa Wasaaradda Waxbarashada, Hiddaha iyo Tacliinta Sare ku amray in shahaadooyin dowladeed la siiyo ardaydii aan ka qayb gelin imtixaanka shahaadiga ah ee qaranka sanad dugsiyeedkii 2015/2016.

Ra’iisul Wasaaraha ayaa arrintan ka sheegay munaasabad xalay ka dhacday caasimadda Muqdisho, xilli uu ka qayb galayay xarig-jarista Masraxa Prof. Shariif Saalax ee Jaamacadda Ummadda Soomaaliyeed.

Xamse Cabdi Barre ayaa sheegay in arday badan oo Soomaaliyeed aysan helin fursad ay ku galaan imtixaanka dowladda xilligaas, sababo la xiriira duruufo nidaam iyo kala-guurkii hay’adaha waxbarashada, taas oo keentay in qaar kamid ah ardaydaasi aysan ku jirin diiwaanka Wasaaradda, isla markaana aysan helin shahaadooyin dowladeed.

“Waxaa jira arday Soomaaliyeed oo nasiib u yeelan waayay inay galaan imtixaankii dowladda sanad dugsiyeedkii 2015/2016. Qaar kamid ah ardaydaasi maanta waxay gaareen heerar sare oo waxbarasho, xitaa heerka PhD, balse ma haystaan shahaadooyin dowladeed. Sidaas darteed, waxaan Wasaaradda ku amraynaa in ardayda buuxisay shuruudaha la siiyo shahaadooyinka dowladda,” ayuu yiri Ra’iisul Wasaaruhu.

Wasaaradda Waxbarashada, Hiddaha iyo Tacliinta Sare ayaa sheegtay in tirada ardaydaasi ay gaareyso ku dhowaad 28,000 oo arday, kuwaas oo ka maqnaa imtixaankii qaranka ee 2015/2016 sababo ay wasaaraddu ku tilmaantay kuwo macquul ah oo la cudur daaran karo. Waxay sidoo kale xaqiijisay inay hayso xogta ardaydaasi, isla markaana ay u baahan tahay oo kaliya in lagu daro nidaamka wasaaradda si loo siiyo shahaadooyinka rasmiga ah.

Ra’iisul Wasaaraha ayaa carrabka ku adkeeyay in aysan suurtagal ahayn in arday dadaalay, waxbartay, una gudbay heerar sare, ay muddo dheer ku sugnaadaan xaalad shahaado la’aan ah sababo la xiriira cillado nidaam.

“Arday kasta oo Soomaaliyeed oo dadaalay, waxbarashadiisana dhameystay, shuruudahana buuxiyay, lagamana helin wax eed ah, waa in xuquuqdiisa waxbarasho la ilaaliyaa, lana siiyaa shahaadada uu xaqa u leeyahay,” ayuu hadalkiisa ku daray.

Go’aankan ayaa la filayaa inuu soo afjaro dhibaato muddo dheer haysatay kumannaan arday oo Soomaaliyeed, kuwaas oo waxbarashadoodu hakad gashay xilli dalka uu ku jiray marxalad kala-guur ah oo dhanka nidaamka imtixaannada qaranka ah.