Muqdisho (Dawan)- Ra’iisul Wasaaraha Soomaaliya, Xamse Cabdi Barre, ayaa Cabdicasiis Laftagareen, madaxweynihii hore ee Koonfur Galbeed, ugu baaqay inuu ka soo laabto jidka uu qaaday, isla markaana uu yimaado wada-hadal nabadeed. Wuxuu hadalkan ka sheegay wareysi uu siiyay barnaamijka Miizaan Podcast oo ka baxa Dawan.
“Odayga meesha aad aadday meel qurux badan ma aha, ka soo laabo,” ayuu yiri Ra’iisul Wasaare Xamse.
Xamse ayaa sheegay in dowladdu diyaar u tahay inay la hadasho Laftagareen, isla markaana aysan jirin wax uu ka faa’iidayo haddii uu u dhaqaaqo dhinaca Al-Shabaab. Wuxuu xusay in Laftagareen uu ku dhowaad toddoba sano xukumayay Koonfur Galbeed, isla markaana ay wada shaqeeyeen. Sidaas darteed, wuxuu ku baaqay in khilaafka lagu dhammeeyo si nabad ah, walaaltinnimo iyo gogol Soomaaliyeed.
Ra’iisul Wasaare Xamse ayaa sheegay in ciidamadii la socday Laftagareen ay u galeen dhul ay Al-Shabaab maamusho, isagoo ku eedeeyay inuu dhallinyaradaas halis galiyay.
“Cabdicasiis Nairobi ayuu ku nasanayaa, laakiin wiilashii ayuu marti uga dhigay Shabaab,” ayuu yiri. Sida uu sheegay, xogta dowladda soo gaartay waxay muujinaysaa in Al-Shabaab ay qiimaynayaan dhallinyaradaas, halka kuwa aan ku biirinna ay wajahayaan khatar nafeed. Wuxuu arrintan ku tilmaamay mas’uuliyad-darro weyn.
Xamse ayaa sheegay in dowladdu dadaal badan ku bixisay sidii Laftagareen dib loogu soo celin lahaa, iyadoo Guddoomiyaha Baarlamaanka uu u diray culimo iyo odayaal ay saaxiibbo yihiin, balse wuxuu tilmaamay inuu ka biya diiday.
