Muqdisho (Dawan)- Wasiirka Caddaaladda iyo Arrimaha Dastuurka Soomaaliya, Xasan Macallin, ayaa ka hadlay caqabadaha hortaagan wada-hadallada u dhexeeya dowladda iyo mucaaradka, isagoo sheegay in dowladda hadda jirta ay tahay tii ugu horreysay ee xafiiska joogta ee si rasmi ah mucaaradka ula fariisata.
Wasiirka ayaa hadalkan ka sheegay dood dadweyne oo cinwaankeedu ahaa “Dastuurka iyo Geeddi-socodka Dhamaystirka Dowlad-dhiska”, oo Jimcihii lagu qabtay Muqdisho, laguna falanqeeyay arrimaha dastuurka iyo jihada dowlad-dhiska Soomaaliya.
Xasan Macallin ayaa sheegay in aysan jirin dowlad ka horreysay tan hadda jirta oo ay uga dayan karaan marka la eego in ay mucaaradka miiska wada-hadalka keento, isaga oo yiri;
“Dowladdan waa tii ugu horreysay ee xafiiska joogta ee mucaaradka la fariisata oo wada-hadallo la gasha; cid naga horreysay ma jirto oo aan uga dayanno.”
Wasiirka ayaa sheegay in dowladda ay miiska wada-hadalka soo saartay arrimo ay ka mid yihiin dastuurka, doorashada, amniga iyo madax-bannaanida dalka, iyadoo doonaysa in arrimahaas looga gaaro xal siyaasadeed oo wadajir ah.
Waxa uu sheegay in dowladda ay diyaar u tahay wada-hadal lala yeesho cid kasta oo qaba aragti ka duwan tan dowladda, balse uu xusay in mucaaradku u kala qeybsan yahay laba dhinac oo ku kala duwan habka ay u wajahayaan wada-hadallada.
