Qaahira (Dawan)- Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta magaalada Al-Calamayn ee dalka Masar kula kulmay dhiggiisa dalka Masar, Madaxweyne Cabdifataax Al-Siisi, inti lagu guda jiray daahfurka Madasha Ganacsiga Al-Calamayn, sida ay sheegtay madaxtooyada Masar.
Madaxweyne Al-Siisi oo soo dhaweeyay Madaxweynaha Soomaaliya, ayaa muujiyay sida uu u qiimeynayo ka qeybgalka Madaxweyne Xasan Sheekh ee madasha. Waxa uu sidoo kale bogaadiyay horumarka laga sameeyay xiriirka Soomaaliya iyo Masar, gaar ahaan tan iyo markii xiriirka labada dal la gaarsiiyay heerka iskaashi istiraatiiji ah oo dhammaystiran bishii Janaayo 2025.
Madaxweynaha Masar ayaa adkeeyay mowqifka dalkiisa ee ku aaddan taageerada madaxbannaanida, midnimada iyo wadajirka dhuleed ee Soomaaliya, isagoo sheegay in Masar ay sii wadi doonto taageerada dhinacyada kala duwan ee Soomaaliya, si loo xoojiyo awoodda dowladda, amniga iyo xasilloonida dalka, loona taageero himilooyinka shacabka Soomaaliyeed.
Dhankiisa, Madaxweyne Xasan Sheekh Maxamuud ayaa muujiyay sida Soomaaliya ay u qadarinayso xiriirka taariikhiga ah iyo walaaltinimada ah ee kala dhexeeya Masar, isagoo bogaadiyay taageerada Masar ay siiso Soomaaliya dhinacyada siyaasadda, amniga iyo horumarinta.
Madaxweynaha Soomaaliya ayaa sidoo kale xusay muhiimadda wada-tashida joogtada ah ee labada dal, isagoo soo dhoweeyay dadaallada Masar ee lagu taageerayo midnimada iyo wadajirka dhuleed ee Soomaaliya, dhismaha hay’adaha qaranka iyo dadaallada lagu soo celinayo amniga iyo xasilloonida dalka.
