Muqdisho (Dawan)— Madaxweynaha Soomaaliya Xasan Sheekh Maxamuud ayaa Talaadada maanta ah u safri doona Addis Ababa, halkaas oo uu kula kulmi doono Ra’iisul Wasaaraha Itoobiya Abiy Ahmed, ka hor inta uusan Arbacada booqasho hal maalin ah ku tagin Jabuuti, sida ay saraakiil ka tirsan dowladda Soomaaliya u sheegeen Dawan Media.
Booqashada Itoobiya ayaa ku soo beegmaysa xilli dagaallo ay ka sii xoogeysanayaan waqooyiga dalka, kadib markii toddoba kooxood oo hubeysan, oo ay ku jirto Tigray People’s Liberation Front (TPLF), ay sameeyeen isbahaysi ay sheegeen inuu doonayo inuu xukunka ka tuuro dowladda Abiy Ahmed.
Ciidamada Tigray ayaa howlgalladooda ku fidiyay gobollada deriska la ah ee Cafar iyo Amxaaro, taas oo sare u qaaday walaaca laga qabo in dagaalku sii ballaarto, isla markaana uu saameyn ku yeesho marinka istiraatiijiga ah ee isku xira Itoobiya iyo Jabuuti.
Sarkaal sare oo ka tirsan dowladda Soomaaliya ayaa Dawan u sheegay in booqashada Xasan Sheekh ee Addis Ababa ay qaadan doonto hal maalin. Ajandaha kulanka uu la yeelanayo Abiy Ahmed si rasmi ah looma shaacin.