Dhuusamareeb (Dawan)- Madaxweynaha Soomaaliya Xasan Sheekh Maxamuud ayaa sheegay in dowladdiisu aysan wiiqin nidaamka federaalka dalka, balse ay doonayso inay xoojiso dowladda dhexe iyo dowlad-goboleedyada.
Madaxweynaha ayaa hadalkan ka sheegay munaasabad lagu xusayay aas-aaska Dowlad Goboleedka Galmudug, oo lagu qabtay magaalada Dhuusamareeb habeenimadii Jimcaha .
Xasan Sheekh ayaa sheegay inay jiraan qaar ka mid ah dadka oo dowladda dhexe ku eedeeya inay faragelin ku hayso ama wiiqayso nidaamka federaalka iyo dowlad-goboleedyada.
Wuxuu sheegay in dowlad-goboleedyada markii ay timid dowladdiisa ayasan jirin balse xilligiisa ay sameysmeen oo hanaqaadeen ayna noqdeen maamulo shaqeynaya, isagoo carabaabay Jubaland, Koonfur Galbeed, Galmudug iyo Hirshabelle.
Madaxweynaha ayaa sheegay in dowladda dhexe ay doonayso inay sii xoojiso nidaamka federaalka, halkii ay wax u dhimi lahayd.
