Al-Calamayn (Dawan)— Madaxweynaha Soomaaliya Xasan Sheekh Maxamuud ayaa Madasha Ganacsiga Al-Calamayn–Afrika kaga hadlay fursadaha maalgashi ee Soomaaliya, isagoo ganacsatada iyo maalgashadayaasha Afrika iyo kuwa caalamiga ah ugu baaqay inay ka qaybqaataan kobcinta dhaqaalaha dalka, sida ay sheegtay Villa Soomaaliya.
Madaxweynaha ayaa khudbaddiisa kaga hadlay isbeddellada dhaqaale iyo siyaasadeed ee dunida, isagoo carrabka ku adkeeyay muhiimadda iskaashiga iyo isku-xirka dhaqaale ee dalalka Afrika.
Xasan Sheekh ayaa sheegay in Soomaaliya ay tahay dal dib u dhismaya oo dib-u-habeyn ku sameynaya dhaqaalihiisa, isla markaana u furan ganacsiga iyo maalgashiga.
“Soomaaliya ma ahan oo keliya dal ka soo kabanaya colaado, waa dal dib u dhismaya oo dib-u-habeynaya dhaqaalihiisa. Waxa aan u furan nahay ganacsiga iyo maalgashiga, waana soo dhoweynaynaa cid kasta oo diyaar u ah in ay nala dhisto,” ayuu yiri.
