Muqdisho (Dawan) – Madaxweynaha Jamhuuriyadda Federaalka Soomaaliya Xasan Sheekh Maxamuud ayaa Khamiistii sheegay in wada-shaqeyntii u dhexeysay dowladda federaalka iyo maamulka Puntland ay si buuxda u joogsatay, isagoo tilmaamay in xiriirkii u dhexeeyay hay'adaha labada dhinac uu hakad galay.
Madaxweynaha oo ka hadlayay munaasabad ka dhacday Muqdisho ayaa sheegay in aysan hadda jirin wax wada-shaqeyn ah oo ka dhaxeysa dowladda federaalka iyo Puntland, isla markaana xiriirkii heerarka kala duwan ee hay'adaha dowladda la joojiyay.
"Maanta la joogaahi maamulka Puntland iyo dowladda federaalka wax ka dhexeeya ma jiraan. Wax walba waa la jaray, waa la joojiyay," ayuu yiri Madaxweyne Xasan Sheekh.
Wuxuu sheegay in hakadkaasi uu saameeyay dhammaan hay'adaha dowladda, oo ay ku jiraan wasaaradaha labada dhinac, kuwaas oo sida uu sheegay aan hadda wax wada-shaqeyn ah yeelan.
Dhanka kale, Madaxweynaha ayaa si cad u beeniyay eedeymo dhowaan soo baxay oo sheegaya in dowladda federaalka ay dad u direyso Puntland si ay uga abuuraan qalalaase ama fitno siyaasadeed.
