Xasan Sheekh: “Soomaaliya ma jiro qof siyaasad u xiran”

Madaxweynaha ayaa sheegay in siyaasiyiin badan oo, sida uu hadalka u dhigay, haddii sharciga la raaco la xiri lahaa ay weli xor yihiin, maadaama dowladdu doorbidayso inay waano iyo wadahadal kula dhaqanto.

“Qaar badan oo haddii qaanuunka la raaco xirmi lahaa ayaa ku jira xattaa, laakiin dowladdu waano iyo caqli-celin ayay la daba taagan tahay. Maalin walba dad ayay u dirtaa, maalinta kalena dad kale, si caqligu ugu soo laabto,” ayuu yiri. “Marka ma jiro qof afkaartiisa aawadeed loo xirayo ama loo dilayo,” ayuu raaciyay.

Hase yeeshee, Xasan Sheekh ayaa ka digay falalka uu ku tilmaamay kicinta dadka iyo hubka u qaybinta, isaga oo sheegay inaan loo dulqaadan karin. “Laakiin dadka in la isku diro, dadka in la kiciyo, dadka in hub loo dhiibo, oo la yiraahdo qoryaha qaata, taasi meel ay ku bannaan tahay ama ku habboon tahay midna ma jirto,” ayuu yiri.

Madaxweynaha ayaa mar kale mucaaradka ugu baaqay inay ka qaybgalaan gogosha wadahadalka ee ay dowladda federaalku furtay, isaga oo sheegay in qof kasta loo oggol yahay inuu miiska soo dhigo ajandaha uu muhiimka u arko. “Haddii qof ra’yi ka fiican gogoshaas haysto ha noo sheego, waan qaadanaynaa,” ayuu yiri.

Hadalka madaxweynaha ayaa imanaya xilli uu khilaaf siyaasadeed ka dhex taagan yahay dowladda federaalka iyo mucaaradka, kaas oo la xiriira wax ka beddelka dastuurka, muddo-xileedka hay’adaha dowladda iyo hannaanka doorashooyinka.