Xildhibaan Abiib oo laba maalin u qabtay in lagu sii daayo dhallinyaro lagu xiray Boorama

Hargeysa (Dawan) – Xildhibaanka ka tirsan Golaha Wakiillada Somaliland, Maxamed Abiib, ayaa xukuumadda u qabtay muddo laba maalmood ah inay kusii dayso dhallinyaro lagu xiray magaalada Boorama, isagoo ku hanjabay inuu ku baaqi doono isu-soo-baxyo nabadeed haddii aan la fulin dalabkiisa.

Xildhibaan Abiib, oo ka soo jeeda gobolka Awdal, ayaa hadalkan ka sheegay shir jaraa’id oo Sabtidii ku qabtay Hargeysa. Wuxuu xusay in haddii dhallinyarada aan Isniinta la sii deyn, inuu ugu baaqi doono shacabka gobolka inay soo baxaan iyagoo nabadgelyada ilaalinaya si ay u difaacaan xaqooda.

“Haddii lagu sii deyn waayo innamada xiran berri iyo berri dambe, waxaan dhammaan shacabka isugu yeereynaa inay soo baxaan, iyagoo nabadgelyada ilaalinaya, si ay u difaacaan xuquuqdooda,” ayuu yiri xildhibaanku.

Dhallinyarada la xiray ayaa xabsiga loo taxaabay bishii December ee lasoo dhaafay, kadib markii dibadbaxyo ka dhacay Boorama ay isu beddeleen rabshado sababay dhimasho iyo dhaawac. Xaaladda ayaa gobolka ka kicisay xiisado siyaasadeed iyo dareen ka dhan ah aqoonsiga Somaliland ee ay ka heshay Israa’iil, iyadoo banaanbaxyo looga soo horjeedo arrintan ay ka dhaceen magaalada.

Madaxweyne Ku-xigeenka Somaliland ayaa Sabtidii gaaray gobolka Awdal si uu u qaboojiyo xiisadda taagan, balse hanjabaadda xildhibaan Abiib ayaa weli aan jawaab rasmi ah ka helin xukuumadda. Gobolka Awdal ayaa dhowrkii bilood ee la soo dhaafay martigeliyay dibadbaxyo goos-goos ah oo salka ku haya cabashooyin la xiriira saami-qaybsiga siyaasadda iyo khilaafyo ku saabsan qaybinta kheyraadka u dhexeeya dowladda dhexe iyo gobollada darafyada ku yaalla.