Hargeysa (Dawan)— Xisbiga mucaaradka Somaliland ee KAAH ayaa Jimcahaan maanta ah cambaareeyay weerarro uu sheegay in kooxda Xuutiyiinta Yemen ay ku qaaday Sacuudiga, isagoo taageero u muujiyay boqortooyada. Xisbiga ayaa bayaan uu soo saaray ku sheegay in weerarrada soo noqnoqda ay khatar ku yihiin amniga iyo xasilloonida Sacuudiga, isla markaana ay halis gelinayaan nolosha dadka rayidka ah iyo kaabayaasha muhiimka ah.
KAAH wuxuu sheegay inuu taageerayo xaqa Sacuudiga uu u leeyahay ilaalinta madax-bannaanidiisa, difaaca dhulkiisa iyo sugidda ammaanka shacabka iyo dadka kale ee ku nool boqortooyada, si waafaqsan sharciga caalamiga ah.
Xisbigu wuxuu sidoo kale ku baaqay in xaramka barakeysan iyo ammaanka dadka u socda gudashada Xajka iyo Cumrada laga fogeeyo colaadaha siyaasadeed iyo kuwa militari.
