Xisbiga KAAH oo ka horyimid safaaradda Somaliland ay ka furatay Quddus

Hargeysa (Dawan) – Xisbiga mucaaradka ah ee KAAH ayaa si adag uga horyimid safaaradda ay Somaliland ka furatay magaalada Quddus, isaga oo ku dooday in go’aankaasi uu ka hor imanayo mabaadi’da siyaasadda arrimaha dibadda ee Somaliland, gaar ahaan Qodobka 10-aad ee Dastuurka.

Xoghayaha Arrimaha Dibadda ee Xisbiga KAAH, Barkhad M. Kaariye, ayaa sheegay in furitaanka safaaradda Quddus uusan waafaqsanayn qodobada dastuurka ee hagaya siyaasadda dibadda.

“Safaaradda laga furay Quddus waa arrin ka soo horjeedda asbaabta uu Madaxweynaha qaranka talada ku fadhiyo. Waxa uu ku fadhiyaa Dastuurka Somaliland, Qodobka 10-aad, faqradihiisa 2-aad iyo 3-aad, kuwaas oo ka hor imanaya tallaabadan,” ayuu yiri Barkhad M. Kaariye.

Xisbiga KAAH ayaa ku tilmaamay furitaanka safaaradda arrin taabanaysa dhinacyada diinta, diblomaasiyadda iyo sharciga, maadaama magaalada Quddus ay muddo dheer ahayd xuddunta khilaafka u dhexeeya Falastiin iyo Israa’iil. Xisbigu wuxuu ku dooday in go’aankaasi u baahan yahay in lagu qiimeeyo dastuurka, danaha Somaliland iyo mowqifka guud ee dunida Islaamka.

Sida uu dhigayo Qodobka 10-aad ee Dastuurka Somaliland, Somaliland waxay aqoonsan tahay kuna dhaqantaa Axdiyada Qaramada Midoobay iyo qaanuunka caalamiga ah. Qodobkaasi wuxuu sidoo kale xusayaa in khilaafaadka siyaasadeed lagu xalliyo wada-hadal iyo dariiq nabadeed, isla markaana Somaliland ay ka tirsan tahay Ummadda Carbeed, shucuubta Afrika iyo caalamka Islaamka.

Dhinaca kale, safaaradda Somaliland ee Quddus ayaa lagu sheegay inay noqon doonto xarun diblomaasiyadeed oo u adeegta xiriirka Somaliland iyo Israa’iil, kana shaqayn doonta arrimaha qunsuliyadda, ganacsiga, maalgashiga iyo xiriirka rasmiga ah ee labada dhinac. Taageerayaasha tallaabadan ayaa u arka fursad lagu ballaarinayo dadaallada Somaliland ee ku aaddan raadinta aqoonsi iyo xoojinta xiriirka caalamiga ah.

Si kastaba ha ahaatee, mucaaradka iyo qaar ka mid ah falanqeeyayaasha siyaasadda ayaa qaba in go’aankani uu xambaarsan yahay khatar diblomaasiyadeed, gaar ahaan marka la eego mowqifka dalalka Islaamka iyo Carabta ee ku aaddan magaalada Quddus.

Xisbiga KAAH ayaa ugu dambeyn ugu baaqay xukuumadda Somaliland inay dib u eegto go’aanka, isla markaana ay tixgeliso Dastuurka, dareenka bulshada Muslimiinta ah iyo saameynta ay arrintani ku yeelan karto siyaasadda arrimaha dibadda ee Somaliland.