Baydhabo (Dawan) – Urur-siyaasadeedka Towfiiq ayaa si rasmi ah u muujiyay walaac xooggan oo ku saabsan habkii loo maareeyay doorashadii 10-kii May 2026 ee ka dhacday Dowlad Goboleedka Koonfur Galbeed Soomaaliya, isagoo sheegay inay jireen falal iyo dhaqammo dhaawici kara hufnaanta, daahfurnaanta iyo kalsoonida geeddi-socodka doorashada.
Towfiiq ayaa tilmaamay in hay’adihii loo igmaday maamulka iyo ilaalinta doorashada ay ku guuldarreysteen gudashada waajibaadkoodii ku aaddanaa xaqiijinta caddaaladda iyo hufnaanta doorashada.
Ururka ayaa sidoo kale cambaareeyay waxa uu ku tilmaamay faragelin siyaasadeed iyo adeegsiga awood dowladeed oo dhaawac u geysan kara kalsoonida shacabka iyo sharciyadda nidaamka doorashooyinka.
“Waxaan si weyn uga walaacsanahay maqnaanshaha kormeer madax-bannaan oo hufan, taasoo sii wiiqday kalsoonidii lagu qabay geeddi-socodka doorashada,” ayaa lagu yiri war-saxaafadeed kasoo baxay xisbiga Towfiiq
Towfiiq ayaa ka digay in isku milanka awoodaha dowladda iyo tartanka siyaasadeed uu khatar ku yahay dhismaha nidaam dimuqraadi ah oo ku dhisan caddaalad, tartan xor ah iyo isla xisaabtan.
