Galmudug (Dawan)– Xisbiga Towfiiq ayaa Axadii sheegay inuu qabanqaabin doono dibadbaxyo nabadeed haddii natiijada rasmiga ah ee doorashooyinka golayaasha deegaanka iyo Golaha Wakiillada Galmudug aysan ka tarjumayn codadka laga diiwaangeliyay goobaha codbixinta, isagoo ugu baaqay Guddiga Madaxa-bannaan ee Doorashooyinka Qaranka iyo Soohdimaha (NIEBC) inuu xaqiijiyo hufnaanta tirinta codadka.
Isagoo shir jaraa'id ka hadlayay, Guddoomiyaha Xisbiga Towfiiq, Sheekh Maxamed Shaakir Cali Xasan, ayaa ku sheegay inay dhaceen wax isdaba marin intii lagu jiray doorashadii dhacday 31-kii Luulyo. Waxa uu sidoo kale sheegay in qaar ka mid ah wakiillada iyo taageerayaasha xisbiga la xiray, la jirdilay ama laga hor istaagay inay codeeyaan.
Sheekh Shaakir ayaa hambalyeeyay shacabka ka qayb qaatay doorashada, wuxuuna uga mahadceliyay taageerayaasha xisbigiisa ka qaybgalka uu ku tilmaamay mid ballaaran oo ka dhacay deegaannada Galmudug.
Waxa uu sheegay in dhammaan xisbiyada siyaasadeed ay wakiillo u joogeen goobaha codbixinta si ay ula socdaan tirinta codadka, wuxuuna guddiga doorashooyinka ugu baaqay inay ku dhawaaqaan natiijooyinka waafaqsan xogta laga diiwaangeliyay goobahaas.
"Waxaan ka filaynaa Guddiga Madaxa-bannaan ee Doorashooyinka Qaranka iyo Soohdimaha inay ku dhawaaqaan natiijada sidii looga diiwaangeliyay goobaha codbixinta. Ma aqbali doonno wax lagu daro ama laga beddelo codadka shacabka," ayuu yiri Sheekh Shaakir.