Jabuuti (Dawan) – Xisbiyada siyaasadeed iyo hay’adaha warbaahinta ee Jabuuti ayaa saxiixay xeer hagaya ololaha doorashada madaxtinimada, iyagoo ballan qaaday in la xaqiijinayo hannaan cadaalad iyo hufnaan leh, sida ay sheegeen mas’uuliyiintu.
Xerkan ayaa la saxiixay Arbacadii, intii lagu guda jiray munaasabad uu soo qabanqaabiyay Guddiga Qaranka ee Isgaarsiinta (CNC), taas oo ay ka qeyb galeen wakiillo ka socday xisbiyada siyaasadeed, maamulayaasha ololaha iyo warbaahinta dowladda.
Waxaa ka mid ahaa ka qeybgalayaasha agaasimayaasha ololaha ee xisbiga talada haya ee Isbahaysiga Aqlabiyadda Madaxtooyada (UMP) iyo xisbiga mucaaradka ah ee Isbahaysiga Dimuqraadiyadda Midaysan(CDU), iyo sidoo kale mas’uuliyiin sare oo ka socday warbaahinta qaranka, oo uu ku jiro Agaasimaha Guud ee Wakaaladda Wararka Jabuuti (ADI).
Xeerkan ayaa dejinaya habraacyo lagu nidaaminayo dhaqanka ololaha iyo warbaahinta, iyadoo ujeeddadu tahay in dhammaan musharrixiinta loo helo fursado siman inta lagu jiro xilliga doorashada.
Warbaahinta saxiixday heshiiska ayaa ballan qaaday inay wararka u tebiyaan si “xirfad leh, dhexdhexaad ah oo dheellitiran,” si waafaqsan xeerarka dalka ee warbixinta doorashooyinka.